Nire konpetentzia digitalaren mailaren inguruko hausnarketa

IKANOS autodiagnostiko testa egin ondoren, hiritar gisa zein profil digital dudan jakinarazi didate nire erantzunak neurtu ondoren. Profil digitalaren gaitasuna Europako esparruaren antolaketa egituran oinarritzen da, hau da,  DIGCOMP ereduan. Eredu hau bat dator Europako Agenda Digitalean zehazturiko irizpide estrategikoekin; gaitasun digitala lortzeko funtsezko diren osagaiak ezartzen ditu eta horretarako beharrezko diren ezagupen, trebetasun eta jarrerak finkatzen ditu.

DigComp markoari buruzko infografia (Arroyo, 2017)

Profil digital orokorrean maila aurreratua eman dut, eta emaitza honetan sartzen dira gaitasun digitalak garatzeko dudan potentziala, hau da, ekipamenduak eta gailuak, konexioa eta sareko sarbidea eta internet erabilera alde batetik eta gaitasun digitalaren maila bestetik, hau da, trebetasuna, ezagutza eta jarrera.

Gaitasun digitala garatzeko ahalmenaren aldetik, badirudi ondo ekipatuta nagoela, konexio mota egokia dudala eta erabileran ere ondo ebaluatu naute, hiru arloetan maila aurreratuan kokatua izanik.

Gaitasun arloan oinarrituz ordea badut zer hobetu. Hemen komunikazioa eta arazoak konpontzea azaltzen dira indarguneen artean. Eta informazioa, edukiak sortzea eta segurtasunean tarteko mailan nago.

Nire ustez, informazioa bilatzen, hau hautatzen, gordetzen, berreskuratzen… nahiko ondo moldatzen naiz baina askotan aurretik bilatu dudan informazioa berriro topatzea kosta egiten zait nahiz eta azkenean topatzen dudan. Uste dut hemen badudala zer ikasi eta zer hobetu.

Komunikazioan maila aurreratua eman dudan arren, onartu behar dut askotan foroetan parte hartzea kosta egiten zaidala. Niretzat oso interesgarria den informazio asko topatzen dut sarean baina nirea partekatzera ez naiz gehiegi ausartzen. Eta puntu hau edukiak sortzearekin lotzen dut. Nire egunerokotasunean  lagungarriak zaizkidan programa desberdinak erabiltzeko gai naiz eta nire ikasleekin eta lankideekin partekatzeko hainbat material sortzeko gai naiz baina kanpora zabaltzea kosta egiten zait. Hala ere beti daude programa berriak ikasteko, hau ez da inoiz amaitzen.

Segurtasunaren aldetik esan nahiko kontziente naizela honek duen garrantziaz baina lizentzien inguruan asko dudala ikasteko.

Badirudi arazoak konpontzen nahiko ondo moldatzen naizela edo behintzak badakidala norengana jo arazo bat dudanean jeje

Orokorrean lortutako emaitzarekin bat nator eta animatzen zaituztet zuek ere IKANOS autodiagnostiko testa egitera.