NIAren osagaiak

Lehenik eta behin esan, NIAren osagaien inguruan Amaia Arroyok egiten duen proposamena izugarri gustatu zaidala. Ez nuen ezagutzen eta nik ere, berak esaten duen bezala, logika ikusten diot. Bertan, NIAren 4 osagaiez hitz egiten digu; gaitasunak, jarrerak, baliabideak eta ikas-ikuspegia. 

Gaitasunen barruan gaitasun digitala eta ikasten ikasteko gaitasuna sartzen ditu. Jarreren barruan, aldaketen aurrean jarrera baikorra izatea eta etengabe ikasten jarraitzeko motibazioa. Baliabideen artean teknologikoak eta ez-teknologikoak bereizten ditu eta azkenik Ikas-ikuspegiaren barruan konstruktibismoa eta konektibismoa ulertzeko beharra eta hezkuntza ez-formala eta informala baloratzearen garrantzia aipatzen ditu.

NIAren osagaien infografia (Arroyo, 2016)

Nire ustez 4 osagaiak dute bere garrantzia NIA garatzeko orduan. Jarrera ezinbestekoa iruditzen zait, aldaketei ez diegu beldur izan behar eta prest egon behar gara hauekin aurrera egiteko eta gure bizitza osoan zehar ikasten jarraitzeko. Hauekin batera eta estuki lotuta gaitasunak daudela esango nuke.

Goi-mailako kirolari batek baditu ezaugarri fisiko batzuk jaiotzen den unetik, baina hauek ez baditu garatzen bere bizitza osoan zehar ez da inoiz goi-mailako kirolari bat izatera iritsiko eta bestalde hain ezaugarri fisiko onak ez dituen pertsona bat bere bizitzan zehar asko saiatzen bada, goi mailako kirolari izatera iritsi al daiteke?

Eta zer esan dezakegu gaitasun digitalaren inguruan? Berezkoa dugun gaitasun bat da? Ikasten da? Gauza guztiak bezala esango nuke ikasten dela baina argi dagoena da pertsona batzuk erraztasun handiagoa dutela beste batzuk baino.

Baliabideak ezin ditugu alde batera utzi, ba al dago piano-jotzailerik pianorik gabe? Nola ikasiko dut ez baditut horretarako baliabide egokiak, eguneratuak, gertukoak…?

Ikas-ikuspegiaren puntua ere garrantzitsua iruditzen zait eta egiten eginez ikasten dela ere aipatuko nuke. Nola dakit zerbait dakidala? … Ba beste norbaiti azaltzeko gai naizenean ezta?

Nire kasuan, esango nuke osagai guztietatik badudala zertxobait. Gaitasun digitala badut eta nahiz eta oraindik ere asko falta zaidan ikasteko, beti nago gehiago ikasteko prest. Aldaketei ez diet beldur, nik “orain arte horrela egin izan dugu”-ri diot beldur gehiago. Baliabideak ere esango nuke baditudala bai teknologikoak baita ez-teknologikoak ere eta azkenik ikas-ikuspegia erabat eraikitzailea dela esango nuke eta metakognizioari gero eta garrantzi handiagoa ematen diot.